Сяргей Яромка: «Прэтэнзій да каманды не маю»
Галоўны трэнер моладзевай зборнай Беларусі падвёў вынік матчу супраць Партугаліі.
- Складаная гульня. Гулялі з адным з фаварытаў групы. Але па змесце гульні і таму аб'ёму інфармацыі, якую мы данеслі нашым футбалістам - дзесьці я і задаволены якасцю гульні. Так, шмат абараняліся, але супраць Партугаліі усе абараняюцца, пытанне - як. Мелі нядрэнныя выхады з абароны. Дзесьці не давялі, дзесьці не хапіла майстэрства - але прэтэнзій да каманды не маю. Думаю, мы будзем рухацца ўсё ж такі наперад.
- Супалала ці тая інфармацыя аб суперніку, што ў вас была, з тым, што вы ўбачылі?
- Практычна так. Адзінае, што ў першым тайме Партугалія трохі перабудавалася тактычна, але ў другім тайме вярнулася да сваёй упадабанай схемы 4-3-3. Але калі параўноўваць іх гульню з Гібралтарам і намі - мы згулялі больш якасна.
- Да прапушчанага гола вы не рабілі замен. Вас задавольваў малюнак гульні каманды?
- Так, у цэлым задавольваў. Тут яшчэ і свая спецыфіка замен: тры паўзы, пяць замен. Таму трэба было таксама прымаць нейкія рашэнні. Калі б можна было паэтапна па адным футбалісту мяняць - можа быць нам і хацелася паступіць трошкі па-іншаму. Але так дыктавала сітуацыя. Замена планавалася да забітага гала, але мы не паспелі яе зрабіць. А падвойная замена была ў сувязі з тым, што мы прапусцілі.
- Фізічны стан зборнай вельмі нядрэнны ...
- Я заўсёды хачу і буду адзначаць трэнераў, якія дэлегуюць футбалістаў у моладзевую зборную. Тут спецыфіка іншая - функцыянальна хлопцаў мы не можам падрыхтаваць. Самае галоўнае нам ведаць іх стан на сёння і яго трошкі падтрымаць. Не схаваю - я баяўся за другі тайм у плане гэтага кампанента. Бо мы ў спарынге ў Гарадзеі далі кожнаму футбалісту згуляць па тайму. Там яны нагрузку яны вытрымалі. Сёння я бачыў, што ніхто з гульні не выпаў. Той жа Канцавы і Падстрэлаў выглядалі вельмі добра, мне спадабаліся яны на флангах. Замены звязаны з тым, што мне хацелася дадаць крэатыву на флангу. Але не атрымалася.
- Не было жадання дамовіцца з Мархелем, каб пасля матчу з Эстоніяй займець у каманду Эбонга і Бахара?
- Тэма разадзьмутая. Калі мне паступіла запрашэнне, адразу былі расстаўленыя прыярытэты. Я яшчэ тады ведаў, што на гэтую чацвёрку - плюс Швяцоў і Плотнікаў - я разлічваць не буду. Дзякуй Богу, што хлопцы трапілі ў нацыянальную зборную. Дай Бог, каб тут з'яўляліся футбалісты, мы будзем іх рыхтаваць для нацыянальнай зборнай. Але мы не спрабавалі дамаўляцца, таму што гэта было адразу агаворана.
- Вы не адчуваеце сябе ў сітуацыі паміж двух агнёў? З аднаго боку вам ставяць жорсткі вынік, а з другога такія ўмовы?
- Не, не адчуваю. Я ўпэўнены ў тых хлопцах, якіх узяў у каманду. Я бачу, як у іх гараць вочы і з якім жаданнем яны прыехалі ў зборную. Я падзякаваў ім за працу. Сёння ў нас у зборнай досыць дужы калектыў. У нас няма яркіх зорак, але за кошт арганізацыі пастараемся і будзем рухацца наперад.
- Партугальскіх журналістаў прыехала прыкладна столькі ж, колькі і беларускіх. Не засмучае, што ў сваіх гульні зборнай не выклікаюць цікавасці?
- Вы сказалі - і гэта выклікае. Калі б гэта залежала ад мяне -я бы вас усіх узяў у Партугалію.
- На левым фланзе гуляе Кучынскі з Першай лігі. Па-ранейшаму, левы фланг абароны ў беларускім футболе праблемнае месца?
- Незалежна у якой лізе футбаліст гуляе, калі ён наймацнейшы - ён будзе гуляць. Суша выйшаў, 2000-га года хлопец, гуляе ў дублюючым складзе. Мякіш, 2000-га года хлопец, гуляе ў дублюючым складзе. У гульні з Гарадзеяй я ўбачыў, што ён можа стаць лідэрам у зборнай. Канцавы не мае гульнявой практыкі ў першай камандзе. Але вельмі добрыя водгукі аб яго гульні за другую каманду - забівае, аддае, зматываваны, прыязджае ў зборную. Ілля Лукашэвіч малайчына - не мае гульнявой практыкі ў Сербіі, але я ўвесь час з ім у кантакце, я маю інфармацыю па ім. Вельмі задаволеныя ім, там два узроставых футбаліста гуляюць у цэнтральнай зоне - я яму сказаў, каб чакаў свайго шанцу. Мне цікава працаваць і са складанымі хлопцамі, але самае галоўнае, каб яны хацелі ехаць сюды, хацелі прагрэсаваць, паказваць сябе.